駱駝知其有拒絕推托的意思，烏鴉天生張揚跋扈作風輕佻，却並非無腦命平之流，過去交代的社務件件辦得乾手淨腳，權腕毒辣利落，撇開撩事鬥非的嗜好不提，也稱得上兄慈弟順。

東星近五萬成員，大底車載斗量，惟陳天雄獨具一股信馬由繮的「真」，當得打經得熬，尤為他器重合意。

養兵用兵，於道於情，是時候拉天窗說亮話。

Piramides雪茄在顎中逗留數秒噴吐而出，揉煉成同樣萬分溫醇的語調：「而家錢就搵夠喇，不過喺有生之年，我淨係想東星個朵夠獎夠響。對上嗰幾屆花炮都得個吉，呢一屆阻唔到同行參加，咁只有加埋一份啦。」

「85年洪義社買起我，係你出手攪掂咗嗰兩條仆街；喺阿姆斯特丹嗰陣你硬撼和利群搶到White Death，幫我搭到龍鴻笙嘅黑龍社...阿大都記晒喺心入面。」

蒼勁略枯瘦的手勾拍烏鴉肩頭：「我老啦，龍頭呢個位坐唔得幾年，有乜大件事要你哋呢D後生仔頂上嘅?」

陳天雄十指交叉撥唇托頦，片時緘默。

難怪老頂特意支走幾乎寸步不離身的古惑倫，他雖無明昭，話外弦音已毋庸贅釋。

崛起、上位、大一統，每個古惑仔趨之若鶩的終極目標。但泱泱幫眾，拿得住的是人手，堵不住的是人口，誰都不服不願五道財水話事權入了一家掌中井，今番駱駝關上門不藏一兵一卒坦蕩表態，固然是為丁財兩旺糖衣裹炮，亦是從港島平地步步築梯鋪路到大霧峰，撐他登第攀極。

光綫將皮手鐲上的水鑽眩曜折射進雙目，瞬閃狙刺直至心窩輕顫，右眼皮莫名一陣激跳。

「得啦，老頂嘅事就係大圍事，呢單野畀D時間我。」

終於鬆口應承，駱駝臉部曲折溝壑似活了般舒放：「攞到丁財，我壽臣山道棟樓，等你同小拳王結婚...」

八字沒撇，駱駝先迫切許諾附加大禮，烏鴉嗤笑出聲：「喫~你講到去邊啊，搶到再講。」

「哈哈哈，到時你唔搞翻百零圍天九翅，我鬧你成世啊。」

「哎吔，你自己個寶貝細女嫁人又唔見你理咁多?」

手提電話震響打破憧憬醞釀，他行近窗前接起，傳來龍睿的問候，混雜隆隆的聒躁背景音。

「點吖阿Ray？」

「無呀，上次我話嗰D好嘢啱啱嚟到葵涌貨櫃，你自己嚟拎定叫人嚟攞走？」

「咁我晏D去搵你。」

「喂，天雄哥，你嗰日同Raven翻到去係咪砌得...太勁啊？搞到個女仔兩日都唔嚟翻工，連假都無請?」

「咩話？兩日無翻你而家先話我知？」

「唔知佢乜環境囉，撥輪又打唔通，我呢度仲有成大堆嘢等住佢做。」

烏鴉得知失聯消息，無端腦髓涼了半截。

「...係咁先，陣間再call你。」

他匆忙掛斷，查看電話無任何新簡訊，緊跟打給阿羽，果然只有機械空泛的忙頻。